#حكاية #مبادرة #غيرت #حياة #آلاف #منى_الكيال #مرأة #تغيير #ارشاد #نفسية ...

 

بص للموضوع بطريقة تانية:

كلمة بنقولها وسط الكلام

ممكن تقولها لو لقيت حد زنق عليك بالعربية ودخل الشارع الأول وبعدين قالك معلش أصل معايا حالة مستعجلة داخلة المستشفى، بدل ما كنت هتتعصب وتشتم، لقيت نفسك فجأة مقدر الظرف اللي هو فيه ورجعتله بالعربية، والنرفزة اللي عندك هديت لأنك بصيت للموضوع بزاوية تانية أو بطريقة تانية أو غيرت تفكيرك تجاه الموضوع.

أو ممكن تقوليها لما تلاقي واحدة دخلت كوافير وفجأة طلبت من الكوافير يحلق شعرها كله ويعملها أحلى ميكب عشان قررت تخرج كدة وبعدين تكتشفي إنها عملت كدة عشان بتاخد علاج وشعرها كدة كدة هيقع فقررت هي تكون شجاعة وتتقبل شكلها ، ساعتها نظرتك للأمور بتتغير لأنك بدل ما تبصي للبنت إنها واحدة متمردة بتمشي ورا التقاليع الجديدة والموضة البايظة فجأة شوفتيها واحدة قوية قدرت وتواجه المرض ومتستسلمش وكمان قررت تقبل شكلها وتحبه ومش أي حد يقدر يعمل كدة.

 تغيير طريقة تفكيرك تجاه الموضوع خلاكي تشوفي حاجة تانية وتستوعبي حاجة تانية وممكن كمان يخليكي تتفاعلي معاها وبدل ما تعامليها جايز بازدراء أو استهجان لفعلها ، الزاوية اللي بتبصي بيها للأمور خليتك متعاطفة معاها وبتبصي لها بنظرة احترام.

"طريقة التفكير" تجاه الأمور بتغير من طريقة تفاعلنا معاها، وده مثال بسيط لحاجة خارجية عنك ، ما بالك بحاجة تخصك إنت أو موقف حصلك، أو طريقة تفكيرك تجاه حياتك أو الزاوية اللي إنت شايف بيها حياتك والأحداث اللي بتمر بيها.

عشان كدة هتلاقي علم النفس الإيجابي بيهتم بطريقة تفكيرنا ونظرتنا للأمور ، وحتى الكوتشنج بيحاول ينور للآخرين مناطق معتمة بداخلهم ويساعدهم يشوفوها بأكثر من زاوية.

وفي مقولة شهيرة بتقول:

" غير تفكيرك .... تلاقي حياتك اتغيرت ..."

الناس بتستهين بالمقولة دي، جايز مش فاهمينها أو جايز مش حاسين بأهميتها أو جايز مش مدركين مدى تأثيرها اللي فعلا بيغير حياة لحياة تانية

بس خليني أقولك تمرين يساعدك إنك تدرب عضلة المرونة في التفكير ويساعدك إنك تغير تفكيرك تجاه أمور كتير في حياتك وبالتالي حياتك بالتدريج هتقرب من أحلامك وتبقى حقيقة ملموسة:

التمرين هو إنك لما تواجه موقف فيه تحدي بالنسبة لك أو مشكلة من وجهة نظرك أو تصادم، متاخدش أول رد فعل يجي على دماغك، حاول تفكر في أكثر من رد فعل، وأكتر من سيناريو يناسبوا الموقف ده، مش بس كدة كمان مع الوقت أنت ممكن تحط نفسك مكان الشخص الآخر وتحط أكتر من سيناريو لأسباب تصرفه ده وردود أفعاله المحتملة أو المتوقعة تبعاً لكل تصور.

عارفة بتفكر دلوقت في إيه J

إن كل ده أعمله وأفكر فيه ، وده ممكن يكون حاجة متعبة

ومين قالك إن التدريبات العقلية بتقل صعوبة عن التدريبات البدنية، واللي عايز فعلاً يشوف نتايج حقيقية في تغيير حياته للأفضل هيبذل المجهود المطلوب عشان يبقى عنده مرونة في التفكير ويقدر يغير منظوره للحياة.

تابعني هنا :

https://www.facebook.com/MonaKayyal

#كوتش_منى_الكيال